ଅଭିଜିତଙ୍କ ଜାମିନ ଖାରଜ କଲେ ସୁପ୍ରିମକୋର୍ଟ

ଭୁନନେଶ୍ୱର: କୋଣାର୍କ ସମ୍ପର୍କରେ ଅରୁଚିକର ମନ୍ତବ୍ୟ ପୋଷଣ କରି ଆକ୍ଷେପ କରିଥିବା ଅଭିଜିତ ଆୟାର ମିତ୍ରଙ୍କ ସମସ୍ୟା ବଢ଼ିଲା । ସୁପ୍ରିମକୋର୍ଟ ଅଭିଜିତଙ୍କ ଜାମିନକୁ ଖାରଜ କରିଦେଇଛନ୍ତି । ଓଡ଼ିଶା ପୁଲିସ ତାଙ୍କୁ ଗିରଫ କରିବା ପରେ ପ୍ରଥମେ ଦିଲ୍ଲୀର ସାକେତ କୋର୍ଟ ତାଙ୍କୁ ପ୍ରଥମେ ସେପ୍ଟେମ୍ବର ୨୮ ତାରିଖ ପର୍ଯ୍ୟନ୍ତ ଜାମିନ ଦେଇଥିଲେ । ଏହାପରେ ସୁପ୍ରିମକୋର୍ଟ ତାଙ୍କୁ ଅକ୍ଟୋବର ୫ ପର୍ଯ୍ୟନ୍ତ ଜାମିନ ଦେଇଥିଲେ । ଏହି ସମୟରେ ସେ ଓଡ଼ିଶା ହାଇକୋର୍ଟକୁ ଚାହିଁଲେ ଜାମିନ ପାଇପାରିବେ ବୋଲି ସୁପ୍ରିମକୋର୍ଟ ନିର୍ଦ୍ଦେଶ ଦେଇଥିଲେ । କିନ୍ତୁ ଏବେ ହାଇକୋର୍ଟର ଓକିଲଙ୍କ ଆନ୍ଦୋଳନ ଯୋଗୁ କୋର୍ଟ କାର୍ଯ୍ୟ ବନ୍ଦ ରହିଛି । ଏଣୁ ଆଜି ତାଙ୍କର ସୁପ୍ରିକୋର୍ଟ ଦେଇଥିବା ଜାମିନ ମିଆଦ ସରୁଥିବାରୁ ଏବଂ ଓଡ଼ିଶା ହାଇକୋର୍ଟରେ ଓକିଲଙ୍କ କାର୍ଯ୍ୟ ବନ୍ଦ ଆନ୍ଦୋଳନ ଜାରି ରହିଥିବାରୁ ଅଭିଜିତ ପୁଣି ସୁପ୍ରିମକୋର୍ଟଙ୍କ ଦ୍ୱାରସ୍ଥ ହୋଇଥିଲେ । ଏ କ୍ଷେତ୍ରରେ ସୁପ୍ରିମକୋର୍ଟ ବିଚାର କରି ଧାର୍ମୀୟ ଭାବନାକୁ ଆଘାତ ଦେଇଥିବାରୁ ତାଙ୍କ ଜାମିନକୁ ଖାରଜ କରିଦେଇଛନ୍ତି । ଫଳରେ ଓଡ଼ିଶା ପୁଲିସ ଦ୍ୱାରା ଅଭିଜିତ ଗିରଫ ହେବା ସମ୍ଭାବନା ଦେଖାଦେଇଛି ବୋଲି କୁହାଯାଉଛି ।
ଅନ୍ୟ ପଟରେ ଓଡ଼ିଶା ବିଧାନସଭା ଗୃହକମିଟି ମଧ୍ୟ ତାଙ୍କୁ ଆସନ୍ତା ୧୧ ତାରିଖରେ ହାଜର ହେବା ପାଇଁ ନୋଟିସ ଜାରି କରିଛନ୍ତି । ଏହି ନୋଟିସ ଅଭିଜିତ ପାଇ ସାରିଛନ୍ତି । ୧୧ ଆସି ହାଜର ହେବା ପାଇଁ ମଧ୍ୟ ସୂଚନା ମିଳିଛି । ବିଧାୟକମାନଙ୍କୁ ବୁଦୁ ବା ବୋକା କହିବା ଘଟଣାରେ ତାଙ୍କ ବିରୋଧରେ ସ୍ୱାଧୀକାର ଭଙ୍ଗ ନୋଟିସ ଆସିଛି । ଏଥିରେ ଆପାତତଃ ପ୍ରମାଣ ଥିବା ଜାଣିବା ପରେ ତାଙ୍କୁ ପକ୍ଷ ରଖିବା ପାଇଁ ବିରୋଧୀଦଳ ନେତା ନରସିଂହ ମିଶ୍ରଙ୍କ ଅଧ୍ୟକ୍ଷତାରେ ଗଠିତ ଏହି ଗୃହ କମିଟି ନୋଟିସ ଜାରି କରିଛନ୍ତି । ପୂର୍ବରୁ ଗୃହ କମିଟି ଦୁଇ ଗଣମାଧ୍ୟମର ସମ୍ପାଦକଙ୍କୁ ଡାକି ଅଭିଜିତର ବୟାନକୁ ଯାଞ୍ଚ କରିଛନ୍ତି । ଦୁଇ ସମ୍ପାଦକଙ୍କ ବକ୍ତବ୍ୟ ରେକର୍ଡ ହେବା ପରେ ଅଭିଜିତଙ୍କୁ ଶୁଣାଣି ପାଇଁ ଡାକିଛନ୍ତି ।
ଅଭିଜିତ କୋଣାର୍କ ଆସିଥିଲା ବେଳେ ଭିଡିଓ ସୁଟିଂ କରି ଟ୍ୱିଟର ଛାଡ଼ିଥିଲେ । ଏଥିରେ ସେ କୋଣାର୍କ ସମ୍ପର୍କରେ ଅତି ଅଶାଳିନ ମନ୍ତବ୍ୟମାନ ଦେଇଥିଲେ । ଏପରି କି ଶ୍ରୀମନ୍ଦିର ସମ୍ପର୍କରେ ବି ଧାର୍ମୀୟ ଭାବନାକୁ କ୍ଷୁର୍ଣ୍ଣ କଲା ଭଳି ମତ ରଖିଥିଲେ । ଓଡ଼ିଶା ବିଷୟରେ ବି ପୂର୍ବରୁ କଦର୍ଯ୍ୟ କରି ମତାମତ ଦେଇଥିଲେ । କୋଣାର୍କ ଓ ଶ୍ରୀମନ୍ଦିର ସମ୍ପର୍କରେ ଅରୁଚିକର ମନ୍ତବ୍ୟ ଦେବା ପରେ ସେ ବିବାଦ ଘେରକୁ ଆସିଥିଲେ । ଏହି ଘଟଣାକୁ ନେଇ ତାଙ୍କ ବିରୋଧରେ କୋଣାର୍କ ଥାନାରେ ମାମଲା ରୁଜୁ ହୋଇଥିଲା । କୋଣାର୍କ ପୁଲିସ ତାଙ୍କୁ ଗିରଫ କରିବା ପାଇଁ ଦିଲ୍ଲୀ ଯାଇଥିଲା । ଦିଲ୍ଲୀ ପୁଲିସ ସହାୟତାରେ ତାଙ୍କୁ ଥାନାକୁ ଆଣି ଗିରଫ କରିଥିଲା । କିନ୍ତୁ ନିୟମ ଅନୁସାରେ ସ୍ଥାନୀୟ କୋର୍ଟରେ ହାଜର କରିବାର ବ୍ୟବସ୍ଥା ଥିବାର ସାକେତ କୋର୍ଟରେ ତାଙ୍କୁ ହାଜର କରାଯାଇ ରିମାଣ୍ଡରେ ନେବାପାଇଁ ଓଡ଼ିଶା ପୁଲିସ ଆବେଦନ କରିଥିଲା । ହେଲେ କୋର୍ଟ ରିମାଣ୍ଡ ଆବେଦନକୁ ଖାରଜ କରିଦେଇ ତାଙ୍କୁ ଜାମିନ ଦେଇଥିଲେ ଏବଂ ସେପ୍ଟେମ୍ବର ୨୮ ସୁଦ୍ଧା କୋଣାର୍କ ଥାନାରେ ହାଜର ହେବା ପାଇଁ କହିଥିଲେ । ପରେ ସେ ସୁପ୍ରିମକୋର୍ଟରୁ ଅକ୍ଟୋବର ୫ ପର୍ଯ୍ୟନ୍ତ ଅନ୍ତରିଣ ଜାମିନ ଆଣୁଥିଲେ ।