ପିପିଲି ଗଣଦୁର୍ଷ୍କମ ରାୟ ଉପରେ ମହାରଥୀଙ୍କ ମନ୍ତବ୍ୟକୁ ନେଇ ଇସ୍ତଫା ଦାବି କଲା କଂଗ୍ରେସ

ଭୁବନେଶ୍ୱର :  ପିପିଲି ଗଣଦୁର୍ଷ୍କମ ଘଟଣାର ରାୟ ପ୍ରକାଶ ପାଇବା ପରେ ଓଡିଶାବାସୀଙ୍କ କୋପରୁ ନିଜକୁ ବଂଚାଇବା ପାଇଁ ମୁଖ୍ୟମନ୍ତ୍ରୀଙ୍କ ଅଧିନରେ ଥିବା କ୍ରାଇମ୍ବ୍ରାଂଚ ଉଚ୍ଚ ନ୍ୟାୟାଳୟରେ ଆବେଦନ କରିବା କଥା କହୁଥିବା ସ୍ଥଳେ ମୁଖ୍ୟମନ୍ତ୍ରୀଙ୍କ କ୍ୟାବିନେଟ୍ ସହଯୋଗୀ, ସ୍ଥାନୀୟ ବିଧାୟକ ତଥା କୃଷି ମନ୍ତ୍ରୀ ପ୍ରଦୀପ ମହାରଥୀ ସତ୍ୟର ଜୟ ହେଲା ବୋଲି କହିବା ଅତ୍ୟନ୍ତ ଦୁର୍ଭାଗ୍ୟଜନକ । ଏଭଳି ସମ୍ବେଦନହୀନ ମନ୍ତବ୍ୟ ଦେଇ କୃଷିମନ୍ତ୍ରୀ ତଥା ସ୍ଥାନୀୟ ବିଧାୟକ ପ୍ରଦୀପ ମହାରଥୀ ପୀଡିତା ଏବଂ ତାଙ୍କ ପରିବାରବର୍ଗଙ୍କୁ ଉପହାସ କରିଛନ୍ତି । ବିଚାର ବ୍ୟବସ୍ଥା ଉପରେ ଦୃଢ଼ ଆସ୍ଥା ପ୍ରକଟ କରିଥିବା ପୀଡିତାଙ୍କ ପରିବାର ଏଭଳି ଶସ୍ତା ତଥା ଦୁର୍ଭାଗ୍ୟଜନକ ବକ୍ତବ୍ୟକୁ ନେଇ ଅସନ୍ତୋଷ ପ୍ରକାଶ କରିଛନ୍ତି । ଆଜି କଂଗ୍ରେସ ଭବନ ଠାରେ ଅନୁଷ୍ଠିତ ଏକ ସାମ୍ବାଦିକ ସମ୍ମିଳନୀରେ ପିସିସି ମୁଖପାତ୍ର ନିଶିକାନ୍ତ ମିଶ୍ର ସିଧାସଳଖ ଭାବରେ କୃଷିମନ୍ତ୍ରୀଙ୍କୁ ଟାର୍ଗେଟ କରିଛନ୍ତି ।
ପ୍ରକାଶଯୋଗ୍ୟ ଯେ ମାନ୍ୟବର ଅଦାଲତ ତାଙ୍କ ରାୟରେ ସିଧାସଳଖ ଭାବେ ଉଲ୍ଲେଖ କରିଛନ୍ତି ଯେ ପ୍ରୋସିକ୍ୟୁସନ୍ ତଥ୍ୟ ପ୍ରମାଣ ଦେବାରେ ବିଫଳ ହୋଇଥିବାରୁ ଅଭିଯୁକ୍ତମାନେ ନିର୍ଦ୍ଦୋଷରେ ଖଲାସ ହେଲେ । ସରକାରୀ ଓକିଲ ଏ ସଂପର୍କରେ ଗଣମାଧ୍ୟମରେ ବକ୍ତବ୍ୟ ରଖି କହିଛନ୍ତି ଯେ ନିମ୍ନ ଅଦାଲତର ରାୟ ବିରୁଦ୍ଧରେ ଉପର କୋର୍ଟରେ ଆବେଦନ କରିବେ । ଯଦି ସରକାରୀ ଓକିଲ ଏବଂ କ୍ରାଇମ୍ବ୍ରାଂଚ ଅନୁଭବ କରୁଛନ୍ତି ଯେ ପୀଡିତାଙ୍କୁ ନ୍ୟାୟ ମିଳିନାହିଁ ତେବେ ସରକାରୀ ଦଳର ମନ୍ତ୍ରୀ ତଥା ସ୍ଥାନୀୟ ବିଧାୟକ ପ୍ରଦୀପ ମହାରଥୀ ଏ ରାୟ ଉପରେ ପ୍ରତିକ୍ରୀୟା ପ୍ରକାଶ କରି କିଭଳି କହିପାରିଲେ ସତ୍ୟର ଜୟ ହୋଇଛି ଓ କ୍ଷୀର – ପାଣି ଅଲଗା ହୋଇଯାଇଛି । ଏଥିରୁ କିଏ ସତ କହୁଛି – ମୁଖ୍ୟମନ୍ତ୍ରୀଙ୍କ ଅଧିନରେ ଥିବା କ୍ରାଇମ୍ବ୍ରାଂଚ ନା ତାଙ୍କର କ୍ୟାବିନେଟ୍ ସହଯୋଗୀ । ଏହା ଉପରେ ମୁଖ୍ୟମନ୍ତ୍ରୀ ନିଜ ବକ୍ତବ୍ୟ ରଖନ୍ତୁ । ଏଭଳି ଏକ ସମ୍ବେଦନଶୀଳ ଘଟଣାରେ ସରକାର ନିଜର ଆତ୍ମରକ୍ଷା ପାଇଁ ଆରମ୍ଭରୁ ମାମଲା ରୁଜୁ କରିବାରେ ଟାଳଟୁଳ ନୀତି ଅବଲମ୍ବନ କଲେ ଏବଂ ଅପରାଧିଙ୍କୁ ପ୍ରମାଣ ନଷ୍ଟ କରିବା ପାଇଁ ଯଥେଷ୍ଟ ସୁଯୋଗ ଦେଲେ । ଘଟଣା ଘଟିବାର ୧ ମାସ ୧୦ ଦିନ ପରେ ମାମଲା ରୁଜୁ ହୋଇଥିଲା ଏବ ପୀଡିତାଙ୍କର ଡାକ୍ତରୀମାଇନାରେ ଅହେତୁକ ବିଳମ୍ବ ଘଟିବା ଯୋଗୁଁ କୌଣସି ସ୍ପଷ୍ଟ ତଥ୍ୟ ଆସି ନଥିଲା । ରାଜ୍ୟ ମାନବାଧିକାର କମିଶନଙ୍କ ହସ୍ତକ୍ଷେପ ପରେ କ୍ୟାପିଟାଲ ହସପିଟାଲରେ ପୀଡିତାଙ୍କୁ ଚିକିତ୍ସା ପାଇଁ ଭର୍ତି କରାଯାଇଥିଲା । ସଂପୂର୍ଣ୍ଣ ଘଟଣା ଗଣମାଧ୍ୟମରେ ଚର୍ଚ୍ଚାର ପରିସରକୁ ଆସିବା ପରେ ପିପିଲି ଥାନାରେ ତା ୯.୧.୨୦୧୨ ରିଖରେ ପିଡିତା ପରିବାରଙ୍କ ପକ୍ଷରୁ ଦିଆଯାଇଥିବା ଏଫ୍.ଆଇ.ଆର. ରୁଜୁ କରାଯାଇଥିଲା । ଏ ସମସ୍ତ ଘଟଣାରୁ ସ୍ପଷ୍ଟ ପ୍ରତୀୟମାନ ହେଉଛି ଯେ ସରକାର ଏ ମାମଲାକୁ ଠିକ୍ ଭାବରେ ପରିଚାଳନା କରିବାରେ ସଂପୂର୍ଣ୍ଣ ବିଫଳ ହୋଇଛନ୍ତି ଓ କୃଷିମନ୍ତ୍ରୀଙ୍କର ଦୁର୍ଭାଗ୍ୟଜନକ ମନ୍ତବ୍ୟକୁ ନେଇ ତାଙ୍କର ଇସ୍ତଫା ଦାବି କରିଛି କଂଗ୍ରେସ ।
ଏହି ସାମ୍ବାଦିକ ସମ୍ମିଳନୀରେ ଅନ୍ୟମାନଙ୍କ ମଧ୍ୟରେ ମୁଖପାତ୍ର ପ୍ରଶାନ୍ତ ଶତପଥୀ, ହିମାଂଶୁ ଲେଙ୍କା, ଅର୍ଚ୍ଚନା ନନ୍ଦୀ ଓ ଦୀପକ ମହାପାତ୍ର ଉପସ୍ଥିତ ଥିଲେ ।

ପ୍ରଦୀପ ମହାରଥୀଙ୍କ ଘର ଉପରକୁ ଅଣ୍ଡାମାଡ଼ କଲା ମହିଳା କଂଗ୍ରେସ